- 760 -

1452. März 22. Meissen.

Herzog Friedrich von Sachsen giebt der Stadt Liegnitz die Zusicherung, dass ihren Einwohnern die dem Römischen Könige Friedrich III als Vormund des Königs Ladislaus von Böhmen geleistete Huldigung nicht zum Schaden gereichen solle.

Wir Fridrich von gotes gnaden herczog zu Sachsen, des heiligen Römischen richs ertzmarschalk, lantgraff in Doringen vnd Marggraff zu Missen bekennen offentlich mit disem brieue allen den, die en sehen, horen ader lesen. Als die ersamen vnd wysen burgermeister, ratmanne, eldisten, schepffen, geswornen vnd die gantze gemeyn der statt Legnitz vnserm lieben besundern dem allerdurchluchtigistin kunige vnd herren, herren Fridrich Römischen künig zu allen cziten merer des richs, herczog zu Oesterreich, zu Steier, zu Kernnten vnd zu Krain, grauen zu Tirol etc. vnserm gnedigisten herren, als einem naturlichen rechten erbuormunden konig Laslawes, ires rechten naturlichen erbherren, als einem erben der crone zu Behmen zu siner gerechtikeit globde, eyde vnd huldunge getan haben, en getraw, gehorsam vnd gewertig zu sin, sulche huldung, wy vorbenant ist, an statt des obgenanten vnsers gnedigsten herren die edeln herren Reinprecht von Ebirstorff etc. vnd her Mathes von Lazan genant Sligk etc. als siner kuniglichen gnaden sende vnd machtboten von den benanten von Legnicz offgenomen haben, das wir nu von gebote vnd beuelung des vorbenanten vnsers genedigston herren des Römischen kunigs von wegen vnd in rechter vormundschafft sines vettern konig Laslaws genant mit gutem willen vnd vorgehabtem rate vnser lieben getrawn, einen gnaden zu eren vnd zu dienst, globet haben vnd globen kegenwertigklich in krafft dises brieues vor vns vnd alle vnsere erben bye vnser furstlichen wirdikeit vnd ane alles arg vnd geferde, den egenanten burgermeistern vnd ratmannen, eldisten, scheppfen vnd geswornen vnd der gantzen gemeinde der statt Legnitz die ytzünt sind vnd ymmer nach en werden, ap zu en nachmals ymands zu zeiten, als sich das geboret, vormeynte besser gerechtikeit zu haben, dann vnser gnedigister herre konig Laslaw, dem sal vnser gnedigister herre der Römisch konig als ein erbuormunde kunig Laslawes, ader kunig Laslaw selbist, so der zu sinen mundigen iaren komen were, recht darumb ergeen lassen als sich das von rechte geboret; wurde dann ymand mit rechte besser recht gewynnen dann vnser gnedigister herre kunig Laslaw obgenant, so sal sie dann ire kunigkliche gnade sulche glubde, eyde vnd huldunge los vnd ledig lassen vnd sagen vnd dahen weisen, dohen sie mit rechte also erkannt werden vnd sie sullen vnd mogen zu allen cziten sich auch dahen also halden ane meniclichs irrung vnd en auch alsdann an iren eeren keinen schaden brengen; auch so globen wir en by vnsern furstlichen wirdikeiten, als uor, das wir sy daruber zu ewigen zeiten hanthaben, schutzen vnd schirmen sollen vnd wollen vor aller menigklich nach aller vnser möglichkeit ane alles arg vnd böses geuerde, auch so globen wir en vor vnser allergnedigsten herren egenant, so sine konigliche gnade von siner keiserlichen kronung wider zu heymat komen wirt vnd so sin vetter egenant zu sinen bescheiden jaren komen vnd mundisch wirt, das sie sich desgleichen auch gen en sollen vorschriben vnd vorbinden in der aller besten formen vnd sy daruber hanthaben, schützen vnd schirmen, als billich ist, vnd en auch alle ire gerechtikeit vnd altherkomen, wie die benant mögen werden, keyne vszgenomen, bestetigen vnd confirmiren sullen vnd zu besserm stande vnd wesen brengen, als billich ist, vnd wir hienachgeschriben Caspar von gotis gnaden bischoff zu Missen, Heinrich, burggraue zu Missen, herre zu Plawen, Heinrich von Gera, herre zu Lobenstein, Heinrich Rewss der elder herre zu Grewtz, Mathes von Lazan, genant Sligk, herre zur Weissenkirchen, burggraff zum Elnbogen, Hildebrand vom Einsidel, ritter, obirmarschalk, Hans von Kokeritz, hofmeister, Hanns von Maltitz, ritter, Nickel von Schonberg, ritter, Dietrich von Miltitz, ritter, Heinrich von Bunaw, ritter, Otto Spiegel vnd wir nachgeschriben burgermeister vnd ratmanne, eldisten, scheppfen, gesworne vnd gantze gemeynde, diser nachgeschriben stete Liptzk, Czwigkaw, Brux, Kempnitz, Dreszden vnd Turgaw globen alle mit gesampter hand vnd vngesundert mit gutem willen vnd vorgedachtem rate mit vnd neben vnsern gnedigsten herren egenant, das en alle obengeschribene glubde, stucke, punckte vnd artikel sollen getruwlich vnd gentzlich gehalden werden by vnsern wirdikeiten, guten trawen vnd eren an alles arg vnd boses geuerde in krafft diesz brieues, an den wir zu gezugnus vnser aller vnd ygliche ingesigel haben lassen hengen. Geschriben vnd gegeben zu Missen am mittwoch nach dem sontag Letare in der fasten. Nach Cristi vnsers herren geburt vierczehenhundert vnd im zweyvndfunffczigisten jare.

O. d. St. L. No. 412. Mit sämmtlichen 19 meist wohl erhaltenen Siegeln an Pergamentstreifen. — Als Vidimus des Rothes zu Jauer, am Sonnobende vor Symonis und Jude 1465. Mit aufgepresstem Siegel. O. d. St. L. No. 412a.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866